पाथर्डीतील घरफोडीत ९५ हजारांचा ऐवज चोरीला

 

पाथर्डी - शहरातील दाट लोकवस्ती असलेल्या जय भवानी चौकातील किरण रमेश लाटणे यांच्या राहत्या घराचा लोखंडी सुरक्षा दरवाजा उचकटून अज्ञात चोरट्यांनी सोन्याच्या दागिन्यासह रोकड असा एकूण ९५ हजार रुपयांचा ऐवज चोरून नेहल्याची घटना घडली असून यामुळे नागरिक चोरट्यांच्या दहशतीखाली असून गुन्ह्याचा तातडीने तपास लावावा अशी मागणी होत आहे.

दरम्यान अज्ञात चोरटा सीसीटीव्ही कॅमेरात कैद झाला असून त्याच अनुषंगाने गुन्ह्याची उकल करावी अशी मागणी होत आहे.शहरातील मध्यवस्तीत जय भवानी चौकात किरण रमेश लाटणे हे आपल्या कुटुंबीया समवेत राहत असून काल मध्यरात्री दोन ते सहा च्या सुमारास अज्ञात चोरट्याने घराचा लोखंडी दरवाजा उघडून घरातील सामानाची व कपाटाची उचकापाचक करून कपाटातील सोन्याचे दागिने व रोख रक्कम असा एकूण ९५ हजार रुपयांचा ऐवज लंपास केला आहे.याबाबत लाटणे यांच्या फिर्यादी नुसार अज्ञात चोरट्या विरुद्ध चोरीचा गुन्हा दाखल करण्यात आला असून पोलीस निरीक्षक संतोष मुटकुळे यांच्या मार्गदर्शनाखाली तपास सुरु आहे.

पाथर्डी येथील व्यवसायिक असलेले लाटणे हे कुटुंबासह शहराच्या मध्यवर्ती भागात रहात असून इलेक्ट्रिक व मोबाईल व्यवसाय करतात.दि. २३ मार्च २०२३ रोजी सकाळी फिर्यादीची आई झोपेतून उठल्या असता कपाटाची झालेली उचकापाचक, घरातील सामानाची उचकापाचक व लोखंडी दरवाजाचे कडी कोयंडा उघलेला दिसल्यावर चोरी झाल्याचे लक्षात आले. यामध्ये दोन तोळा सोन्याचे नेकलेस अंदाजे ३० हजार रुपये, एक तोळा सोन्याचे नेकलेस अंदाजे १५ हजार रुपये, पाच ग्रॅम वजनाच्या तीन सोन्याच्या अंगठ्या अंदाजे ३० हजार रुपये, तीन ग्रॅम वजनाच्या दोन सोन्याच्या अंगठ्या अंदाजे १२ हजार रुपये असा सोने दागिन्याचा ऐवज व खिशातील रोख रक्कम ८ हजार रुपये त्याची किमंत एकुण ९५,०००/- हजार रुपयाचा ऐवज अज्ञात चोरटयाने चोरुन नेहला असल्याने लाटणे कुटुंबीय आर्थिक विवंचनेत सापडले आहे.