अल्पवयीन मुलीवर अत्याचार प्रकरणी आरोपीस १० वर्षे सक्तमजुरी

 

अहमदनगर - अल्पवयीन मुलीवर अनैसर्गिक अत्याचार केल्याप्रकरणी आरोपी नामे रविंद्र मोहन कोपरगे, रा.इंदीरानगर,शेवगाव ता.शेवगाव जि.अहमदनगर यास अहमदनगर येथील पी.आर.देशमुख अतिरिक्त व विशेष (पोक्सो कोर्ट) जिल्हा व सत्र न्यायाधीश यांनी भा.दं.वि. कलम ३७६,३७६ (अ) (ब) (२) (आय) (जे) तसेच लैंगिक अपराधापासून बालकांचे संरक्षण करणारा कायदा २०१२ चे कलम ४ व ६ नुसार दोषी धरून प्रत्येकी गुन्हयानुसार आरोपी रविंद्र मोहन कोपरगे यास १० वर्षे सक्त मजुरी व रूपये ५,००० / - दंड व दंड न भरल्यास १ वर्षे साधी कैदेची शिक्षा सुनावली आहे.

सदर खटल्याचे कामकाज विशेष सरकारी वकील अॅड. मनिषा पी. केळगंद्रे - शिंदे यांनी पाहिले.सदर खटल्याचा निकाल हा अतिशय कमी कालावधीत म्हणजेच केवळ ९ महिन्यामध्ये लागलेला आहे. घटनेची थोडक्यात हकीगत की,मौजे शेवगाव शहरातील इंदिरानगर येथील राहणारा आरोपी नामे रविंद्र मोहन कोपरगे याने ५ वर्षीय वयाची अल्पवयीन पिडीत मुलगी हीस मोबाईल खेळण्याच्या बहाण्याने त्याचे घरी नेवून तिच्यासोबत अनैसर्गिक शारिरीक अत्याचार केला. सदर घटनेची फिर्याद पिडीत मुलीचे आईने शेवगाव पोलिसां कडे दिली त्यानुसार आरोपी विरुध्द गुन्हा दाखल होवून सदरचा तपास ए.पी.आय. आशिष शेळके यांनी पूर्ण करून मा.न्यायालयात दोषारोपपत्र दाखल केले. या खटल्यामध्ये सरकार पक्षातर्फे एकूण ६ साक्षीदार तपासण्यात आले. यामध्ये अल्पवयीन पिडीत मुलगी, पिडीतेची आई, पंच साक्षीदार तपासी अधिकारी, वयासंदर्भात नगर परिषद पाथर्डीचे रजिस्टार क्लर्क अंबादास साठे व वैद्यकिय अधिकारी डॉ. गहिनीनाथ खेडकर, सिव्हील हॉस्पिटल अहमदनगर यांच्या साक्षी महत्वपूर्ण ठरल्या. सरकारी वकीलांनी केलेला युक्तीवाद व केस मध्ये झालेला पुरावा ग्राहय धरून आरोपीस मा.न्यायालयाने वरिल प्रमाणे शिक्षा ठोठावली. सदर खटल्याचे कामकाज विशेष सरकारी वकील अॅड.मनिषा पी. केळगंद्रे - शिंदे यांनी पाहिले. त्यांना पैरवी अधिकारी राणी बोर्डे तसेच पो.कॉ. विजय गावडे , पो.कॉ. खंडागळे यांनी सहकार्य केले.