लंपी आजारावरील उपाययोजनेत पालिकेचा हलगर्जीपणा !

पाथर्डी – शहरात जनावरांमधील लंपी आजाराचा वेगाने फैलाव सुरू असून पंचायत समिती व पालिका प्रशासनाच्या वेळकाढूपनामुळे जनावरांना कोणी वाली उरले नाही. उघड्यावर मृत जनावरे टाकून पालिका कर्मचारी आजाराच्या फैलावाला निमंत्रण देत असून पालिका मुख्याधिकाऱ्यांचे या गंभीर विषयाकडे लक्ष नाही. पालकमंत्र्यांनी गांभीर्याने लक्ष देण्याची मागणी गोरक्षण समिती, हिंदु रक्षा युवा मंच, शिवसेनेच्या कार्यकर्त्यांनी करत मुख्याधिकाऱ्यांच्या दालनात ठिय्या आंदोलन केले. यावेळी आंदोलकांनी पालिका प्रशासना विरोधात जोरदार घोषणाबाजी केली.

शहरात सुमारे पाचशे गायी, गोर्हे, वळू आदी गोवंश बेवारस फिरून प्लास्टिक कचरा, चहाचे कागदी ग्लास, टाकाऊ भाजीपाला, हॉटेल खानावळीचे वेस्टेज खाद्य खात फिरतात अन्नपदार्थ चिकटलेल्या कॅरीबॅगा तर लहान वासरे सुद्धा खातात पालिकेचे या प्रश्नाकडे वारंवार लक्ष वेधत नागरिकांनी प्रशासनाला कळवून काहीच कार्यवाही होत नसल्याने शहरातील गोप्रेमींनी व गोरक्षण समितीने मृत गाईंची विल्हेवाट वर्गणी गोळा करून लावण्यासाठी पुढाकार घेतला. काही पत्रकारांनी पशुवैद्यकीय अधिकारी तथा प्रभारी गटविकास अधिकारी डॉ जगदीश पालवे, पालकमंत्री राधाकृष्ण विखे यांच्या कार्यालयाचे याकडे लक्ष वेधले. बुधवारी दुपारी शहरातील गोप्रेमी तरुणांनी उपजिल्हा रुग्णालयाच्या आवारात प्राणांतिक वेदनेने तळमळणाऱ्या गाय व वासरांना एकत्रित करून गटविकास अधिकाऱ्यांना कळविले. मीटिंगमध्ये असून निरोप देतो असे सांगूनही वेळेवर मदत मिळाली नाही. पंचायत समितीला पूर्णवेळ गटविकास अधिकारी मिळत नाही‌. पशुसंवर्धन विभागाकडे कर्मचारी नाहीत. पालिका व पंचायत समिती परस्परांच्या संपर्कात नाही.

निवडणुकीमुळे लोकप्रतिनिधींना गायीच्या वेदना ऐकू येत नाहीत. यंत्रणेतील उदासीनतेमुळे एका गाईचा तडफडून मृत्यू झाला. यापुढील अत्यंत संताप जनक प्रकार आज पालिका कर्मचाऱ्यांनी करत गोप्रेमींची व कार्यकर्त्यांची दिशाभूल करण्याचा प्रयत्न केला. सकाळी पालिकेच्या जुन्या कार्यालयापुढे लंम्पी सदृश्य आजाराने गाय मृत पावली. कार्यकर्त्यांनी कर्मचाऱ्यांकडे चौकशी केली असता गाडगे आमराई परिसरात अंत्यविधी केल्याचे सांगण्यात आले. तेथे कार्यकर्त्यांनी पाहणी करत पुन्हा कर्मचाऱ्यांना प्रश्न केला. तेथे नाही तर कचरा डेपो च्या बाजूला अंत्यविधी केला असे उत्तर कर्मचाऱ्यांनी दिले. कार्यकर्त्यांनी तेथे धाव घेत पाहणी केली तर डुकरांच्या मृतदेहाच्या गराड्यात उघड्यावर गाईचा मृतदेह टाकून दिल्याचे आढळून आले. उघड्यावर टाकून देऊन या रोगाचा फैलाव होईल. तसेच गोमातेची विटंबना होत असल्याचे पहात विविध हिंदुत्ववादी संघटनांच्या कार्यकर्त्यांनी पालिका कार्यालयात धाव घेत मुख्याधिकाऱ्यांना धारेवर धरले. गोमातेची संबंधित विटंबना करणाऱ्या कर्मचाऱ्यांवर कारवाई करण्यात यावी अशी मागणी यावेळी आंदोलकांनी केली. 

या संतप्त आंदोलन करणाऱ्या युवकांपुढे उत्तर देताना मुख्याधिकारी संतोष लांडगे यांनी दिलगिरी व्यक्त करत संबंधित कर्मचाऱ्यांची चूक मान्य करून यापुढे असे प्रकार होणार नाही कोणाच्याही भावना दुखावल्या जाणार नाहीत याची काळजी घेवु तसेच तश्या सक्त सूचना आरोग्य विभागास दिल्या. पशुवैद्यकीय अधिकारी यांच्याशी संपर्क करून जनावरांची तपासणी करू व उपाययोजना राबवु असे पत्र आंदोलकांना दिले.यावेळी गोरक्षण समितीचे सोमनाथ बंग, मुकुंद गर्जे, शिवसेनेचे नंदकुमार डाळिंबकर, आशुतोष शर्मा, सारंग मंत्री, नानासाहेब पालवे, महेश बाहेती, निलेश इजारे, आदिनाथ लगड, अमोल केरकळ, प्रशांत हम्पे, सनी दिनकर, तेजस पटवा आदिंसह कार्यकर्ते उपस्थित होते.