सरकार अतिवृष्टीग्रस्त शेतकऱ्यांना भरीव मदत करणार - महसूलमंत्री विखे

 

शेवगाव - महाराष्ट्र राज्याचे महसूल मंत्री राधाकृष्ण विखे यांनी मंगळवारी शेवगाव तालुक्यातील पूर्व भागातील बोधेगाव, बालमटाकळी, लाडजळगाव येथील खरीप पिकाबरोबर कापूस पिकाची बांधावर जाऊन पाहणी करून शेतकऱ्यांशी संवाद साधून नुकसान झालेल्या पिकाची पाहणी केली तसेच यावेळी बोलताना सरकार शेतकर्यांना भरीव मदत करणार असल्याचे सांगितले.

शेवगाव तालुक्यातील पिकांचे सर्वाधिक नुकसान झाले असून या दौऱ्या दरम्यान  मंत्री राधाकृष्ण विखे व जिल्हाधिकारी राजेंद्र भोसले यांनी कृषी विभागाच्या अधिकाऱ्यावर चांगलेच फैलावर घेतले.हे सरकार शेतकऱ्यांच्या बाजूने असून पंचनामे हे सरसकट करून नुकसान भरपाई देऊन भरीव मदत करणार असल्याचे ना. विखे यांनी सांगितले. ई पीक पाहणीचे अट शिथिल करून पीक विम्या संदर्भात लवकरच सर्व विभागाच्या अधिकाऱ्यांची जिल्हास्तरीय बैठक बोलवण्यात येवून शेतकऱ्यांना मदत करण्याची भूमिका राज्य सरकारची असेल असे महसूलमंत्री विखे यांनी सांगितले. 

यावेळी जिल्हाधिकारी राजेंद्र भोसले, प्रांताधिकारी देवदत्त केकान, तहसीलदार छगनराव वाघ, उपविभागीय पोलिस अधिकारी अनिल कातकडे, पोलीस निरीक्षक विलास पुजारी, भाजपा जिल्हाध्यक्ष अरुण मुंडे, उपसरपंच तुषार वैद्य, माजी जिल्हा परिषद सदस्य नितिन काकडे, शेवगाव कृषी उत्पन्न बाजार समितीचे माजी सभापती रामनाथ राजपुरे, चंद्रकांत गरड, मोहनराव देशमुख यांच्यासह महसूल विभाग, पोलीस विभाग कृषी विभाग, शिक्षण, आरोग्य, सार्वजनिक बांधकाम विभाग, महावितरण आदी सर्वच विभागाचे अधिकारी, पदाधिकारी, मान्यवर, कार्यकर्ते मोठ्या संख्येने यावेळी उपस्थित होते.

ना.राधाकृष्ण विखे  यांचा हेलिकॉप्टरने  दौरा असल्याने त्यांना परिसरातील दुरवस्था झालेल्या रस्त्यावरील खड्ड्यांचा सामना करावा लागला नाही.सरकार शेतकऱ्याचा विचार करत नाही म्हणून वंचित बहुजन आघाडीच्या वतीने ना. विखे यांना काळे झेंडे दाखवण्यात येणार असल्याचे समजताच शेवगाव पोलिसांनी वंचित बहूजनच्या कार्यकर्त्यांना खबरदारी म्हणून शेवगाव व बोधेगाव येथे स्थानबद्ध केले होते.आ.मोनिका राजळे यांचे कार्यकर्ते या दौऱ्या पासून लांब असल्याने चर्चेचा विषय ठरला.