मिडसांगवी शाळेत साकारली शिवसृष्टी

पाथर्डी – मिडसांगवी येथील जिल्हा परिषदेच्या प्राथमिक शाळेत 'शिवसृष्टीची' निर्मिती करण्यात आली असून नुकतेच सरपंच प्रतिनिधी भगवान भाऊ हजारे यांच्या हस्ते फीत कापून या आदर्श प्रकल्पाचे उद्घाटन करण्यात आले.

कार्यक्रमाच्या अध्यक्षस्थानी शालेय व्यवस्थापन समितीचे अध्यक्ष शत्रुघ्न जाधव हे होते.शिवसृष्टी,' अंतर्गत छत्रपती शिवाजी महाराजांचे भव्य तैलचित्र भिंतीवर रेखाटले असून जाळीचे कुंपण केलेले आहे. शोभिवंत झाडांचे रोपण केलेले असून घोड्यावर स्वार शिवरायांच्या तैलचित्रावर रंगीत विजेच्या दिव्यांची योजना केलेली आहे. रात्री रंगीत प्रकाश योजनेमुळे विलोभनीय दृश्य दिसते. मिडसांगवी गावामध्ये 'शिवसृष्टी' मुळे नवा सेल्फी पॉईंट अवतरल्याचे जाणवत आहे. 

इयत्ता चौथीच्या अभ्यासक्रमातील शिवरायांचा संपूर्ण इतिहास वक्तृत्व मालेतून साकारण्यात आला. पाठ्यपुस्तकातील अठरा पाठांवर अधारीत अठरा विद्यार्थ्यांची मनोगते सादर झाली.विद्यार्थ्यांच्या वक्तृत्वाने उपस्थितांची मने जिंकली. रंगीबेरंगी आकर्षक फुलांची सजावट तसेच रांगोळी काढण्यात आली होती. शिवसृष्टी अंतर्गत शिवरायांच्या जीवन कार्यावरील विविध पुस्तके विद्यार्थ्यांसाठी उपलब्ध करण्यात आली आहेत. शिवरायांच्या विचारांचा प्रसार व्हावा, भविष्यात बालवक्त्यांतून शिवव्याख्याते घडावेत असा उद्देश 'शिवसृष्टी' निर्मितीमागे असल्याचे मुख्याध्यापक बाळासाहेब घोंगडे यांनी सांगितले.

‌सदर कार्यक्रमास उपसरपंच विष्णू थोरात, माजी सरपंच दत्तात्रय पठाडे, अनिल जाधव, ग्रामपंचायत सदस्य शौकत शेख, राम पठाडे, महेश हजारे, अमोल पठाडे, सुनील हजारे, दिनेश पठाडे, ग्रामसेवक आंधळे भाऊसाहेब, भीमराज घोंगडे, सुनील केदारे,सोपान शिंदे, शरद गायकवाड यांची प्रमुख उपस्थिती होती. कार्यक्रमाचे प्रास्ताविक मुख्याध्यापक बाळासाहेब घोंगडे यांनी केले.सूत्रसंचलन व्यंगचित्रकार दीपक महाले यांनी केले. आभार प्रदर्शन ज्ञानेश्वर वाघ यांनी केले. कार्यक्रम यशस्वी करण्यासाठी कल्याण कराड, बंकट बडे, वाल्मीक बडे,मंजुषा कानडे,धर्मप्रसाद जोशी, मनीषा खेडकर यांनी परिश्रम घेतले.