आष्टी पोलिसांनी दुचाकी चोराच्या मुसक्या आवळल्या

 

कडा - नगर जिल्ह्यात दुचाकी वाहनांची चोरी करुन विक्री करणारा आरोपी वैभव उर्फ बाबासाहेब सुरोडे वय-२५ (रा. मातवळी ता. आष्टी) याच्या आष्टी पोलिसांनी मुसक्या आवळून गजाआड केले, त्याच्याकडून महागड्या दोन दुचाकी हस्तगत केल्याची माहिती पोलिस निरिक्षक संतोष खेतमाळस यांनी दिली.

याबाबत पोलीस सुत्रांकडून मिळालेली अधिक माहिती अशी की, मागील महिन्यात कडा येथील राहूल नेनसुखलाल बलदोटा यांची होंडा कंपनीची (एमएच-२३-बीए-५३१५) या क्रमांची अॅक्टीवा दि. ०८/०६/२०२३ रोजी मध्यरात्री घरासमोरुन चोरीला गेली होती. याबाबत बलदोटा यांच्या फिर्यादीवरुन आष्टी पोलिसांत गुरनं, २५३ कलम ३७९ भादवी अन्वये दुचाकी चोरीचा गुन्हा नोंद करण्यात आला होता. आष्टीचे उपविभागीय पोलीस अधिकारी अभिजीत धाराशिवकर, पोलिस निरिक्षक संतोष खेतमाळस यांच्या मार्गदर्शनाखाली पोउनि अजीत चाटे, पोहेकाॅ रविराज निमसे, पोना हनुमंत बांगर, पोना. जाधव, पोशि मजहर सय्यद, पोशि तांबे, पोशि वाणी या पथकाने तांत्रिक पद्दतीने कौशल्यपूर्ण तपास करून आरोपी वैभव उर्फ बाबासाहेब सुरोडे यास ताब्यात घेऊन पोलीसी खाक्या दाखवून अधिक चौकशी केली असता त्याने या गुन्ह्यात चोरी केलेली ग्रे रंगाची होंडा कंपनीची अॅक्टीवा व काळ्या रंगाची स्कुटर चोरी करून आरोपीने मातकुळी येथील लक्ष्मी आईचा मळा येथे घरासमोर लावली असल्याची गोपनीय खबर आष्टी पोलिसांना मिळाळी. त्या, अनुषंगाने तपास करुन आरोपीला दुचाकीसह ताब्यात घेऊन गजाआड केले. नगर येथील स्थानिक गुन्हे शाखेचे पोलिस निरिक्षक दिनेश आहेर यांनी दोन दिवसांपुर्वी चोरीच्या सहा बुलेट व दोन ट्रॅक्टर असा २४ लाख ८० हजार रुपयांचा मुद्देमाल आरोपींसह हस्तगत केला होता. सदर आरोपी हा जामिनावर सुटल्यानंतर आष्टी पोलिसांनी त्याला मुद्देमालासह ताब्यात घेऊन इतर गुन्ह्याची उकल केली आहे. या दुचाकी चोरांच्या टोळीत आष्टी पोलिसांनी पकडलेल्या वैभव सुरोडे याचा सहभाग उघड झाला आहे.

--------%%-----