शेताचा बांध फोडणाऱ्या ५ जणांना ३ वर्षाचा कारावास !

पाथर्डी – तालुक्यातील ढवळेवाडी येथील शेताचा सामाईक बांध फोडून शेतात अतिक्रमण करू नका असे समजावून सांगणाऱ्या फिर्यादी महिलेला व तिचा दोन मुलांना मारहाण करून हाताला चावा घेवून गंभीर जखमी केल्या प्रकरणी गुन्ह्यातील ५ आरोपींना न्यायालयाने ३ वर्ष सश्रम कारावास व प्रत्येकी २५००० पंचवीस हजार रुपये दंडाची शिक्षा ठोठावली आहे.

ढवळेवाडी येथे फिर्यादी जिजाबाई भाऊसाहेब माने व आरोपी राजेंद्र वासुदेव माने,भागवत राजेंद्र माने,अर्जुन राजेंद्र माने,मुक्ताबाई राजेंद्र माने,रंजना वासुदेव माने यांची शेतजमीन असून दिनांक १२/१०/२०१५ रोजी सकाळी १० वाजण्याच्या सुमारास आरोपी फिर्यादी जिजाबाई भाऊसाहेब माने व त्याने दोन मुले यांच्या शेताचा सामाईक बांध कोरत होते त्यास फिर्यादी व तिच्या मुलांनी विरोध केला असता आरोपी राजेंद्र याने फिर्यादी जिजाबाई यांच्या हाताचा अंगठ्याला चावा घेवून बोट तोडून टाकले तसेच फिर्यादीचा मुलगा नारायण याचे डावे हाताला आरोपी रंजना हिने चावा घेतला तर आरोपी अर्जुन याने फिर्यादीचा मुलगा नवनाथ याचे उजवे हाताचे अंगठ्यास चावा घेतला व डोक्यात मारहाण करून लाथाबुक्क्याने मारहाण करून गंभीर जखमी केले होते.

पाथर्डी पोलिसात दाखल फिर्यादीच्या अनुशंगाने तपास करून न्यायाधीश व्ही.आय. शेख यांच्या न्यायालयात खटल्याच्या सुनावणीत सरकार पक्षातर्फे एकूण ६ साक्षीदार तपासण्यात आले. फिर्यादी व तिच्या दोन मुलांना आरोपींनी चावा घेवून गंभीर जखमी केले प्रकरणी न्यायाधीश व्ही.आय.शेख यांनी पाचही आरोपींना दोषी धरत दोन वर्ष सश्रम कारावास तसेच प्रत्येकी ५००० पाच हजारांचा दंड तसेच दंड न भरल्यास प्रत्येकी एक महिना सक्त मजुरी तसेच फिर्यादीला पाचही आरोपींनी मारहाण करून जखमी केले बाबत आरोपींना १ वर्षाची सक्त मजुरीची शिक्षा ठोठावली असून आरोपीला करण्यात आलेल्या दंडाच्या रकमेतून फिर्यादीला २०,००० वीस हजार रुपये नुकसानभरपाई देण्याचा आदेश दिला असून दोनही तुरुंगवासाच्या शिक्षा सोबत भोगायच्या आहेत.सरकारी वकील नितीन भिंगारदिवे तसेच सरकारी वकील प्रज्ञा गीते यांनी सरकार पक्षा तर्फे काम पहिले.