नवरात्रीत व्ही.आय.पी.ना गाभारा दर्शन बंदचा निर्णय !

पाथर्डी  - कोरोना कालावधीनंतर दुष्काळ पाणीटंचाई अशा नैसर्गिक आपत्तीच्या वेळी भाविकांची गर्दी वाढते असा पूर्वीचा अनुभव लक्षात घेता यावर्षी शारदीय नवरात्रोत्सवात राज्यातील भाविकांची गर्दी मोहटा देवस्थानात वाढणार असून एकाच वेळी समूहाने भाविकांची वाहने आणण्यापूर्वी देवस्थान समिती व पोलीस प्रशासनाची परवानगी आवश्यक असल्याची सूचना प्रांताधिकारी प्रसाद मते यांनी दिली.         

शारदीय नवरात्र उत्सवाच्या कालावधीत मोहटा देवस्थानात होणाऱ्या उत्सवा संबंधी देवस्थान समितीच्या सभागृहात प्रशासकीय बैठकीचे आयोजन करण्यात आले होते यावेळी जिल्हा न्यायाधीश तथा देवस्थान समितीचे अध्यक्ष सुनील गोसावी, पाथर्डीच्या न्यायाधीश अश्विनी बिराजदार, धर्मदाय उपायुक्त उषा पाटील, पोलीस उपअधीक्षक सुनील पाटील, तहसीलदार श्याम वाडकर, पोलीस निरीक्षक संतोष मुटकुळे, प्रभारी गटविकास अधिकारी डॉ जगदीश पालवे, वनपरिक्षेत्र अधिकारी अरुण साबळे, आगारप्रमुख आरीफ पटेल, उपनिरीक्षक रामेश्वर कायंदे व सचिन लिमकर याशिवाय वीज वितरण ,सार्वजनिक बांधकाम ,पालिका, पंचायत समिती, आदी विभागांचे विभाग प्रमुख, सर्व विश्वस्त, उपस्थित होते.

यंदा शारदीय नवरात्रोत्सव 15 ऑक्टोबर पासून 26 ऑक्टोबर पर्यंत चालणार असून याकालावधीत भाविकांची सर्वाधिक वर्दळ होऊन वाहतूक कोंडीचा वारंवार त्रास होतो. गाड्यांमागे धावणारे एजंट, वाहनांवर पूजा साहित्य फेकून मारणारे विक्रेत्यांचे हस्तक, खाजगी पार्किंग धारकांकडून वाहनधारकांची होणारी लुटालुट ,रस्त्यात होणारी वाहतूक कोंडी आदी समस्यांवर उपायासाठी विशेष कृती कार्यक्रमाखण्यात आला आहे.शहरातील वाहतूक कोंडी कमी करण्यासाठी हलकी व मध्यम वाहने उपजिल्हा रुग्णालयाकडून तर जड व अवजड वाहने तनपुर वाडी मार्गे मार्गक्रमण करतील. मोहरी मार्गे रस्ता अति तातडीच्या प्रसंगी वापरता यावा म्हणून राखीव ठेवण्यात येणार आहे.नवरात्री दरम्यान शहरातील अतिक्रमण मोहीम पूर्ण होऊन बाजार तळामधून जाणारा रस्ता राखीव ठेवण्यात येणार आहे. राजकीय व्यक्ती, मोठे पदाधिकारी, यासह व्हीआयपी लोकांना नवरात्र कालावधी दरम्यान गाभारा दर्शन बंद ठेवण्याबाबत आदेश जिल्हा न्यायाधीश तथा अध्यक्ष सुनील गोसावी यांनी देवस्थान समिती प्रशासनाला देऊन आरतीचे यजमान गाभाऱ्यातील जाळीच्या बाजूने आरती करतील. गाभाऱ्यातील गर्दीचा सर्वसामान्य भाविकांना अडथळा होऊ नये, भावीक हाच यात्रेचा मुख्य केंद्रबिंदू असेल असे सांगत गाभारा दर्शन बंदीचा निर्णय घेण्यात आल्याचे गोसावी म्हणाले. सर्व भाविकांनी सहकार्य करण्याचे आवाहन देवस्थान समितीतर्फे करण्यात आले.