हर्षदाला आंतर विद्यापीठ वेटलिफ्टींग स्पर्धेत सुवर्णपदक

 

पाथर्डी - हिमाचल प्रदेश केंद्रीय विद्यापीठ, धर्मशाला येथे संपन्न झालेल्या अखिल भारतीय आंतर विद्यापीठ वेटलिफ्टींग स्पर्धेत बाबुजी आव्हाड महाविद्यालयाची विद्यार्थिनी हर्षदा गरुड हिने सावित्रीबाई फुले पुणे विद्यापीठाचे प्रतिनिधित्व करताना ४५ किलो वजन गटात एकूण १४३ किलो वजन उचलून सुवर्ण पदक पटकावले. 

हर्षदा ही आंतरराष्ट्रीय खेळाडू असून तिने ग्रीस या देशात झालेल्या ज्युनियर जागतिक अजिंक्यपद वेटलिफ्टींग स्पर्धेत ऐतिहासिक कामगिरी करत भारतास पहिले सुवर्णपदक मिळवून दिले होते. तसेच या आंतर विद्यापीठ स्पर्धेमधून हर्षदा व योगिता खेडकर यांची इटानगर, अरुणाचल प्रदेश येथे होणाऱ्या खेलो इंडिया युनिव्हर्सिटी गेम्स वेटलिफ्टींग स्पर्धेसाठी निवड करण्यात आली आहे. त्यांना शारीरिक शिक्षण संचालक प्रा. डॉ. विजय देशमुख यांचे मार्गदर्शन लाभले. या यशाबद्दल पार्थ विद्या प्रसारक मंडळाचे अध्यक्ष अभय आव्हाड, उपाध्यक्ष ॲड. सुरेशराव आव्हाड, महाविद्यालयाचे प्राचार्य डॉ.जी.पी. ढाकणे, उपप्राचार्य डॉ. बी. ए. चौरे यांनी या खेळाडूंचे अभिनंदन केले व पुढील स्पर्धेसाठी शुभेच्छा दिल्या.